Фанатка синмаськиз Серебренниковлы но Минеахметовлы ,)

"Удмурт дунне" гожтэ:

Синмаськи - быри!

Кемалась ик овол Сарапул ёросысь Сигаево гуртамы вуылизы но сюлэме пычамон концерт сётизы эстрада кырзанъя «Шулдыр жыт» ансамбльысь артистъёс. Чузъяськизы удмурт, пор, зуч кырзанъёс. Сцена вылысь усточиос шоры учкыса, эсьмаса, кырзаны но, эктыны но мылкыд жутиськиз. Нош «шулдыр жытъёслы» тау карон сярысь малпан йырам чилектиз но, кылы быгыльмиз, пыдъёсы купырмизы. Соин ик тау карон кылъёсме но сюлэмме газет пыр шараяме потиз.
Коня зеч кыл веразы артистъёс учкисьёслы - ваньмыз асьсэлы но ньыльдон пол мед берытскоз. Сюлэм ик няська, мылкыд ик жутиське, соос шоры учкыса: удмурт анай-атайёссы сыче бадзым быгатонлык, дисьтонлык но йонлык пычатиллям та «Шулдыр жытысь» кырзасьёслы!
Нимысьтыз кыл вераме потэ Руслан Серебренниковлы. Атаезлэн кисьтэм-басьтэм тусбуйыз гинэ лякиськымтэ Русланлы: пычаса кылем анай-атаезлэн жингрес куаразы, йонолэсь йоно выросъёссы, учкисьлэн сюлэмаз усьтон шедьтон быгатонлыксы. Солы амалтэк синмаськод!
Нош мусо Сашикез (егит артист Александр Минниахметовез) тыбыртиз топ-топ вешаме потэ. Аслаз куараез кырзась гумыезлэсь (курайлэсь), оло, сю поллы чебергес. Нош эктэмез, поръямез… Чылк-чылк удмурт.
Чиданды ноку медаз чигы, сцена вылэ котькуд потэмды вой вылти кадь мед ортчоз, калыклы вунонтэм мед кылёды. Лымы букосъёсын чоктам пичи гуртъёсы, бадзым каръёсы - вольыт сюрес!
Н. Батуева.
Сарапул ёрос.

П. С. Саша Минеахметовлэн янгышен гожтэмын ук нимыз :)

 Фотоын: Серебренниковлэн выросъёсыз - выжыысь-выжые.

http://www.udmdunne.ru/articles/art6124.html